كله خير !!!
كتبهاسامي حرك ، في 20 سبتمبر 2009 الساعة: 08:21 ص
إمبارح بالليل دخلت البنزينة بسأل عن 80 , رد العامل بأرف : مفيش غير 90 !
وكأني بعترض , نتشت العربية ع الأول !
رجلي كانت كاتمة على دواسة البنزين لما سمعت خبط , صوت الماتور عالي , مفيش عزم , وشحط وتزييء ع الأرض وكأني ساحب لوري !
بطلت العربية , فتحت الباب أشوف إيه الحكاية ؟ نزلت ورايا بنتي , اللي كانت شابطة معايا !
لوح حديد شبك بيحطوه على خط مجاري المحطة , كان مرفوع شوية , العجلة داست على طرفه ضأر في بطن العربية , جاب الشكمان ع الأرض !
ياخبر !!! الفلوس اللي في جيبي يا دوب تجيب بنزين , إيه مصيبة الشكمان دي كمان ؟؟؟
يا بقر ,,, يا ولاد ديك الكلب ,,, إيه اللي إنتو حاطينو في سكة البني آدمين ؟؟؟
بنتي شدتني م الـ تي شيرت : إيه يا بابا ؟ بالراحة متزعأش كده !
يا أستاذ الفانوس بتاعك مكسور , لو النور شغال كنت شفت الحديدة المرفوعة , إشمعنى إنت اللي خبطت فيها ؟ ما المحطة مليانة عربيات !
الواد رد عليا من ورا ضهره , وهو بيعد فلوس !
محاولتين ع الفاضي , بحاول أربط الشكمان في أي حاجة , شوية معافرة , وكل ما أجرب أدور أسمع صوت الماتور فظيع , هدومي إتوسخت , وبتوع البنزينة زي ما يكونوا فرحانين , والبت جنبي موتراني !
قفلت العربية , وقلت أسيبها كده , وآجي بكرة بالنهار أشوف حكايتها !
تاكس –سوري- ميكروباااااااااز !
النهاردة الصبح خت ميكروباص م الموقف اللي إتعمل على باب عمارتنا !
قعدت جنب السواق , الأجرة 75 , قلت للسواق : ها نزل عند البنزينة , لو ممكن تقول عندها !
رايح شركة ولا حاجة ؟ صوت طخين بلدي وجلابية إسكندراني , راجل كبير شوية بالنسبة لسواقة ميكروباص !
لا , رايح البنزينة نفسها , أصل …. وحكيت له الحكاية كلها !
خير !
بصيت له بإستغراب !
قول خيييير !
إيه ؟ ده مشروع خناقة ! ياعم الحاج هو أنا مش حكيت لك البهدلة اللي أنا شفتها !
خير إيه وبتاع إيه ؟
طيب إسمع دي ,,, ""كان فيه ملك ووزير , وكل ما الملك يقول حاجة الوزير يقول : خير !
ناكل , نشرب , نلبس , نروح , نيجي , كله خير خير خير خير .
الملك صابعه إتقطع , الوزير قال : خير !
وداه السجن : باردو خير !
الملك يوم راح الصحرا طلع عليه جماعة خطفوه عشان يدبحوه , ولما وصل للي بيدبح , شاف صباعه المقطوع , قال : ما ينفعش ها تولي واحد سليم !
الملك فرح بسلامته , طلع الوزير م السجن !
الوزير قال : لو كنت معاك كان زمانهم دبحوني , عشان كده , كمان السجن كان خير"" !
البنزينة أهيه ! أي خدمة !
وأنا نازل م الميكروباص : واللهي إنت اللي خير , شكراً !
وأنا في الورشة بصلح العربية , لقيتني بقول لنفسي : الراجل السواق ألف لي الحكاية دي مخصوص , عشان يريحني , ولا هو –بس- حكى حدوتة من الحواديت اللي الناس الطيبين بيتصبروا بيها ؟
ـــــــــــــــــــــــــــــــــــــــــــــــــــــــــ
التصنيفات : ثقافة, مقالات | أرسل الإدراج | دوّن الإدراج
أكتوبر 11th, 2009 at 11 أكتوبر 2009 11:25 ص
فى مهب الريح
فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع .
1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
باقى المواضيع فى الرابط التالى:
http://www.ouregypt.us/culture/main.html