اللغة المصرية الحالية , فيها قواعد اللغة المصرية القديمة , ومليانة بألفاظها وتعبيراتها , لدرجة تختلط الأمور معاها , حتى على النخب والمهتمين بالثقافة المصرية ! اللي بيتابعوني على مدونة علم مصر وعلى جروبات التيار المصري في موقع الفيس بوك , شافوا نماذج كتيرة من الألفاظ , اللي شكلها عربي , لكن –بعد العرض- يعرفوا إنها ألفاظ مصرية , بحالتها , أو حصل عليها شوية تحوير , وممكن نرجع تاني –مثلا- لمقالات عن :

 *للبيع بجد !!! كلمة جد بمعنى كلام حقيقي !!!

*ياعيب الشوم (شين) , عن كلمة (شون / شوم / شين) المصرية ومعناها عيب !!!

*حكاو , وأصل كلمة حكاية !!!

في حوار حميم مع صديق مهتم بثقافة مصر , وجدته يؤكد أن كلمة شوف بمعنى : أنظر , هي كلمة عربية , ومنها : شاف يشوف !

دون أن أرجع للقوامس المصرية , رديت في الحال , وقلت له إن اللفظ ده مش موجود , لا في القرآن ولا في الشعر الجاهلي , على أساس إن هما دول المرجع الأساسي عشان نعرف أصالة أي لفظ عربي , رغم إن فيهم –بردو- ألفاظ غير عربية (أعجمية) , المهم رجعت البيت فتحت قاموس ألان جاردنر وقاموس برناديت موني لقيت الكلام ده :

*شف (شب) = أعمى , ومكتوبة بالمصرية القديمة (حوض مستطيل + شلتة مربعة + مخصص عين) يعني حرفين إتنين (ش +ب تقيلة) وجنبهم مخصص العين !

*شوف (شوب) = أنظر , مكتوبة (حوض مستطيل + كتكوت + شلتة مربعة + مخصص عين) يعني تلات حروف (ش+و+ب تقيلة) جنبهم مخصص العين !

*شاف (شاب) = رأى , مكتوبة (حوض مستطيل + عقاب زي النسر + شلتة مربعة+مخصص عين) تلات حروف (ش+أ+بي تقيلة بيتحط تحتها تلات نقط) جنبهم مخصص العين !

وزي ما إنتو شايفين , الفرق بين العمى والنظر , حرف واحد !

*بتر = انظر , مكتوبة (شلتة مربعة +نص رغيف +فم (بوء) +مخصص عين) يعني تلات حروف مصرية (ب تقيلة +ت +ر) جنبهم مخصص العين !

*بتص = إنتبه , بحلق بعنيك , مكتوبة (شلتة + نصر رغيف + عصاية ملوية أو توب قماش متني+ مخصص العين) يعني (ب+ت+سا ص) جنبهم مخصص العين !

بتص شوف , خلي بالك من كلامك , اللغة المصرية لسة معانا , شغالة يعني !!!

 ننقل من الشوف والبصبصة على حاجة ممكن تلخبطنا كلنا , خاصة بأشهر الشتايم الأبيحة , وهي أصلها مكنتش أبيحة ولا حاجة , إنما التعريب خلا شكلها كده :

*كسم = إحترس من , مكتوبة (مقطف بودن واحدة+مزلاج أوعقدة+بومة+مخصصين , دراع بتشاور وصقر) يعني (ك+س+م) جنبهم مخصص للإنتباه والصحصحة والتركيز, خليك زي الصقر !

والحكاية إنها تحذير من شخص أو شئ بمعنى : حرس من فلان , خلي عينك عليه !!!

يعني جملة : كسم الحزب الوطني , معناها –بالمصري- حَرّس وخلي عينك ع الحزب الوطني لا يبلعنا وياكل البلد في كرش أعضاؤه !