في تحقيق على صفحة كاملة , وفي أعداد  يومية من حلقات عديدة , يتحفنا كاتب قناة الجزيرة / يسري فودة , في جريدة المصري اليوم , بآراؤه ومشاهداته (المفبركة) عن الماسونية !!! 

مليش دعوة , لا بالأسلوب الفج ولا الأداء الركيك , ولا الكذب والتلفيق المفضوح  , إنما لفت نظري حاجتين :

الأولانية :

إن أمريكا فيها 3 مليون ماسوني , وأن 8 ماسونين -على الأقل- وقعوا إعلان الإستقلال , وإن 15 ماسوني وقعوا على الدستور الأمريكي  , وإن 26 رئيس امريكي أعلنوا إنتسابهم للمحفل الماسوني , ده غير اللي ما أعلنوش

نضيف لكل ده , إن كل دولار أمريكي فيه إعلان -مجاني- للماسونية في صورة رمزها أو اللوجو بتاعها , اللي هو عبارة عن عين واحدة -شبيهة بعين حورس-على قمة هرم مصري موجودين على الدولار , لأنهم بيقولوا إنهم إمتداد لبناة الأهرامات من أتباع تحوتي/هرمس وتقدروا تتأكدوا فورا دلوقتي من أي دولار أمريكي !

البنك المركزي الأمريكي كان أصدر بيان عشان يفسر وجود الرمز الماسوني , بأنه تخليد لدور البناءين الأوائل (الماسون) في تأسيس أول بنك أمريكي !

نقدر نضيف لكل ده , فقرة من خطاب الرئيس الأمريكي هاري ترومان -نقلا عن حلقات يسري :

أياد لا حصر لها تتعانق كل يوم , وآباء لا حصر لهم يودعون أبناءهم وهم يقولون : يا ولدي حين يحل بك الظلام والوحدة إبحث عن ماسوني , وقل له أنك إبن ماسوني , وستجد فيه صديقا لن يخذلك

يعني ببساطة -حسب المعلومات والأرقام دي- ممكن نبص للماسونية من زاوية إنها عامل رئيسي في بناء أمريكا , وفي تأسيس الكيان الأقوى والأرقى في العالم كله !

الحاجة التانية :

إن سي يسري بيقول إنه لا شاف ولا عنده مستندات توضح كراهيتهم للدين إنهم لاتصل للدرجة 33 بينهم إلا بعد تمزيق القرآن والإنجيل , ورغم كده بيكلمنا بثقة عن فساد الماسونين وعداؤهم للأديان وتنفيذهم للمخططات الصهيونية , وإستشهد بقرار لجامعة الدول العربية سنة 1979 -يعني لما كانت جبهة الرفض والتصدي طردت مصر- يدين الماسونية , كإلهاء مكرر للشعوب الغلبانة , عشان يفهموهم إن الدنيا كلها ضدهم , يعني عشان العسل والطحينة اللي بيسيلوا منهم , ههههة!

الحكاية إني , لا ماسوني , ولا يهمني الموضوع ده من أساسه , إنما إتخنقت ,  لما واحد  تُمن كاتب على ربع صحفي ياخد الشهرة دي كلها , لمجرد إنه بيدجل ويضحك على القراء بالشكل ده , حاجة تغيظ وتقرف !

طيب لما الماسونية ساهمت في تأسيس أكبر كياني إقتصادي سياسي عسكري في الوجود , مش ده مبرر إننا ندرسها بموضوعية شوية , ولا يعني إحنا إنكتب علينا ناكل نيلة ونشرب نيلة ونسمع نيلة ونقرا نيلة وندخل الحمام برجلنا النيلة !

يا شيخ بلا ماسونية بلا نيلة !